|
عدنان كنفاني
من غير ما تقولي رح بقلك
من يوم شفتك.. غرّد الحسّون في صدري
وصحيت من قهري
علّقت حلمي عاطرف نجمة
وقلتلها طيري معي لبعيد
نسافر سوا لبلاد ساكنة فينا
ومتبتة شروشا
بشوفا يا محلاها
ونسوان بتزغرد.!
يمكن فرح.؟
بعرف بيقولو زغرِدن يوم الفرح
يوم النصر
شايف زغاريدُن مطر
وزهور وشوية حبأ
بيعطّرِن تربة شهيد
من يوم شفتا، غرّد الحسّون في صدري
قالت تعا لنروح يا عمري
وطرنا..
نجمة.. وأنا.. وهي
ما كان في بالكون غير إحنا
والناس مخمورين
قالت:
شايف عمدّ الكون، هاالأرض شو كبيرة
ومزيّنة بمروج
وسهول وحكايات
وجبال خضرا عالية
ومزنّرة بغابات
وأنهار عم تروي عطش
شايف يا قلبي الأرض شو كبيرة
وشو مخزّنه خيرات
هي كلها إلنا
من يوم ما آدم سكن هالأرض
فتّش عحوا
ولما لقاها سارحة وحدا
ضما لصدره وقال
تعالي يا حوا نطلب الغفران
ونكمل المشوار
نكتب وصية، نقول:
لولادنا الجايين
تيعمّروها بحب وبإيمان
فجأة، سمعت صياح.. وأنّات مقهورة.!
وشفت، رشقة دمْ، بتلوّن الأخضر
مين عم يصرخ.؟
صرخة وجع عناتها بتدبح
نزلِت النجمة شويّ
وشفت دار مهدّمة
وصوات عم تنده لناس قراب
ما في حدا سامع
مين عم يصرخ.؟
قالت: طفل مسكين
خايف
وبيرجف
مد راسه من سخام الهدّ
بينده عأمه، عأخته، عالجيران
ما في حدا غير الفضا الحيران
والدخان
ودبابة وراها جنود
عم يضحكو
كان الولد ماسك بإيده حجار
من حيطة دمار الدار
شو صار.؟
رصاصة لئيمة طارت من بعيد
من حد دبابة
طيّرت راس الولد
مات الولد
مات الولد
مسكت بإيديّ أنّات صوته هالحزين
وزرعتها بالأرض
شوي.. وفرّخت أطفال
وتلال من حجار
هالأرض شو كبيرة
وشو مخزّنة خيرات يا قلبي
بس يا خسارة
ما في حدا بيرد عصرخة ولد مفزوع
مرعوب
مات الولد
خلق الولد
شفت بإيده الحجر صاحي
هُمّي بيهدّو حيط
وهوّ بيبني حيط
ونسوان بتزغرد
وبتعرف كيف تحب وبتولد
بكره بيصيروا رجال
والأرض رح تكبر كمان أكتر
وتتزين بغابات
وسهول وحكايات
وجبال رح تعلا
وأنهار رح تروي عطش
وتتزين بزهرات
شايف يا قلبي أرضنا
كل ما لها بتكبر
وبتخزّن الأطفال والخيرات
هي كلها إلنا
ورح تبقا
|
