بتعرف شو يعني مخيم ... ! / سارة رميض

---

سارة رميض

المخيم يعني لعبة طابة بالحارة بين أولاد الجيران ؛ و هيصة و فرح يملا المكان ... 

المخيم يعني تدق ع جيرانك برمضان و تقلن امي اشتهتلكن هالطبخة ... 

المخيم يعني تدق ع جارك تقله بدي رغيف خبز انقطعنا يجي يعطيك ربطة ... 

المخيم شب بياكل قتلة من شباب الحارة لأنه لطش بنت حارتن أو اذاها بكلمة أو تطلع فيها تطليعة غلط ... 

المخيم يعني سمار و جمال و بنت اخت رجال و ولد بيخلق من بطن أمه زلمة ...

المخيم يعني وطي صوت الاغاني جارنا ميت ما حلوة ...

المخيم يعني تعليلة و زغاريد و دبكة و رقصة للصبح ... 

المخيم شب ماسك ايد حجة و عم يقطعا الشارع ... 

المخيم يعني أدق ع أي باب اقلن عطشان سقوني مي ! 

المخيم يعني خالتي هاتي عنك الاغراض لأوصلك ياهن عالبيت ... 

المخيم إني اخاف على بنت بلدي ؛ بنت مخيمي و اصون عرضها لأنها عرضي ... 

المخيم يعني رجال ؛ يعني شهامة ؛ و إنسانية و حب الخير للغير ... 

المخيم يعني اشارك ابن مخيمي بأفراحه و اتراحه و بالعزا قبل العرس أكون جنبه ... 

المخيم يعني بساطة و أصالة ؛ يعني طيبة ؛ يعني ناس عندها مبدأ و ضمير ... إن غلطت بحق بعضها بتفيق الصبح تستسمح ربها ! 

المخيم يعني انا وانت و كلنا ايد وحدة ما بفرقنا حقد وكراهية و فتنة و عدوانية ... 

المخيم يعني الحب .... و الحب كله هو المخيم

تاريخ الاضافة: 04-03-2017